شريف عازر يكتب: وائل عباس.. وقهرة الظلم

رأي
كتب :

أنا عندي اعتراف وكنت متردد أقوله. أنا محتاج أطلع اللي جوايا وأقول إن القبض على وائل عباس كسرني شخصيا. القبض على وائل كان ليه تأثير على حاجات كتير أوي في حياتي, مش بس عشان هو صاحبي, لا عشان حاجات كتير أوي.

القبض على حد زي وائل عباس كسرت عندي حتة إن المشهور ممكن يكون محمي شوية, وائل يعتبر أشهر ناشط حقوقي ومدون في الشرق الأوسط, يعني من الآخر وائل يعتبر أقصى طموح أي حد فينا في قوته على التأثير وتحريك الرأي العام وبردو النظام ما همهوش.

وائل كان بالنسبة ليا يعتبر بوصلة لمواضيع كتير ومقياس لمواقف كتير. وائل يعتبر نموذج للشخص اللي بيشوف الحق في المطلق من غير أي اعتبارات شخصية.

عشان كدة وائل كان ممكن يتخانق مع ناس قريبين ليه لو أخدوا مواقف غلط أو متخاذلة ومكانش عنده استعداد يبرر لهم وكان بيقول لهم إنتوا غلط في وشهم. ويمكن ده اللي خلى وائل بعيد عن دواير النشطاء المعروفين, بس في نفس الوقت أثبت إن وائل مواقفه ومبادئه ثابتة في الوقت اللي كان فيه ناس كتير بتغيّر مواقفها بحسب الظروف.

وائل أخد مواقف معاكسة كتير ضد التيار ودفع تمنها من مهاجمة وعزل, لكن في كل مرة وائل كان بيطلع صح إحنا الغلط, وإن هو كان شايف اللي جاي وحذرنا منه.

للي ما يعرفش, أنا بعمل الدكتوراة بتاعتي عن نشطاء الإنترنت ودورهم في تحويل لغة حقوق الإنسان للغة شعبية. طبعا من غير ما أقول وائل عباس يعتبر أهم مثال على ده. وائل معروف بلغته الشعبية السهلة واللي بيوصل بيها رسايل حقوقية وسياسية مهمة جدا عجزت منظمات كبيرة عن توصيلها زي مثلا دور وائل في قضايا التعذيب وازاي حول موضوع التعذيب ده لموضوع بيتناقش في الشارع, وده كان يعتبر نقلة نوعية في مجال حقوق الإنسان في مصر.

وائل بيواجه تهم خيالية تماما زي انضمامه لجماعة إرهابية مع إن وائل معروف إنه عدو لكل الجماعات والتيارات الدينية المتطرفة, ومش الدينية بس لأنه عمره ما انضم لمجموعة معينة، وكان بيفضل دايما يكون الصوت المستقل عشان يقول الحق من غير أي حسابات. يعني إاللي بيحصل لوائل دلوقت دليل على إننا بنعيش في حالة ظلم بيّن. القبض على وائل وصلنا لمرحلة فقدان الأمل بس هنفضل نحاول ونعافر ضد الظلم.

بكرة تطلع يا صاحبي وترجع مكانك تدافع عن الحق وتقول الحقيقة في وش أي حد مهما كان. حبسك مش هيقلل منك ولا من قيمتك وتأثيرك, بالعكس ده بيثبت إن النظام بيخاف منك وعامل لرأيك حساب.

حبسك بيخجلنا كلنا وبيشرفك أنت, إحنا خجلانين إننا مش قادرين نطلعك لحد دلوقت, بس والله ما هنسكت ولا هنوقف كتابة وكلام عنك لحد ما تطلع وترجع مكانك بين أهلك وأصحابك ومتابعينك.

#FreeWaelAbbas

#free_wael_abbas

#wael_abbas

 #WaelAbbas

#egypt

#الحرية_لوائل_عباس

#وائل_عباس

#وايل_عباس

#الحرية_للمعتقلين

اترك تعليق