وتابع حديثه: ” الوضع في سيناء اختلف كثيرا عن العامين الماضيين، والأمر اختلف في سيناء كثيرا افتكروا الدنيا كانت عامله ازاي من سنتين، والدنيا عامله إزاي خلال السبعة أو الثمانية شهور الأخيرة”.

واستطرد: “لكن في المطلق ده معناه مفيش عمليات إرهابية ممكن تحصل، لكن قادرين نحافظ على الموضوع”.

وفيما يخص قضايا المنطقة ليبيا وسوريا واليمن والصومال وغيرها: “عدم السماح بوجود الميلشيات المسلحة على أراضي هذه الدولة وهذا موقفنا والأصل في أي دولة هو جيشها وشرطة اللي بيحققوا الاستقرار”.

وأردف: “سوريا بتحاول إيجاد صيغة مع المعارضة المعتدلة والنظام السوري، بندعم الجيش الوطني الليبي فهو المسئول عن حماية الدول وليس الجماعات والميلشيات المسلحة، ونطالب بانتخابات في أسرع وقت لوجود نظام يدعم وحدة البلاد” .

وأضاف السيسي خلال جلسة “اسأل الرئيس”،  بالمؤتمر الوطني للشباب إنه يتمنى إنجاز التشريعات الخاصة بالمحليات خلال الفترة المقبلة على أسرع وجه ، فهناك لابد من تشريعات يجب أن يتم تحديثها في المحليات .

وتابع: ” 30 يونيو 2020 في كلام كتير مش هتكلم فيه علشان الأشرار، وما سيتم إنجازه سيكون من خلالكم أنتم يا مصريين والدولة المصرية هتكون في مكان تاني”.

واستطرد: “انتم زعلانين ليه، المفروض تكونوا فرحانين على اللي بتعملوه فإحنا اتفقنا العهد بتاعكم وبتاعي هتكملوا معايا لحد ماتنفذوا عهدكم معايا وعهدي معاكم”.

وتابع الرئيس حديثه بجلسة “اسأل الرئيس” في المؤتمر السادس للشباب بجامعة القاهرة، “أنا لما جيت مقلتش المرتبات هتزيد الضعف، التحديات كتير وأنتم هتحلوها معايا.. مخدعناش بعض إحنا كنا بنتكلم بشفافية ومسؤولية الواقع في مصر محتاجين نتحرك مع بعض “.

 وأردف: “إذا كنتم هتاخدوا مؤشر الأسعار هو القياس فقط في تناول الحكم على مصر انتم بتظلموا التجربة، لأن في 3 يونيو النهضة هنا ورابعة هناك البلد بيتم إشعالها وشوفتوا الاعتداء على مديريات الأمن ومحاولة اغتيال وزير الداخلية محمد إبراهيم ومخلصش بينا خلص بالتضحيات التي قدمها رجال الأمن والشرطة.

افتكر أكبر تضحية إن أم تقدم ابنها أو زوجة تقدم زوجها اعتقد دي أصعب تضحية وإحنا متلملمين من الأسعار تفتكروا هيقولوا أيه، وبالمناسبة الضحايا كتير والشعب قدم كتير علشان مصلجة البلد “.

وأضاف “قلت لكم إننا هنتعب مع بعض قلتم حاضر تيجوا في نص السكة تقولوا مش لاعبين، طالما على العهد معاكم يبقوا تبقوا على العهد مش معايا مع بلدكم، با قول الكلام دا إحنا في المطلع النهائي لو ربنا وفقنا وتجاوزناه تبدأ الأمور تستقر لدولة بمعايير دولة، مصر هتبقى في موضع تاني في 30 يونيو 2022 .

حد يقولي أنت زودت غاز المنازل ليه؟

إحنا بندي الأنبوبة لمحدودي الدخل بـ 100 جنيه لو بياخد انبوبتين بعد الزيادة دي غاز المنازل ما يوصلش للوضع دا، فدا لا يقارن بالراجل الغلبان اللي بياخد أنبوبتين في اليوم، ومش هنزود السكة الحديد إلا لما نطورها نكون جبنا 50 أو 60 جرار بعربيتهم، لو عملنا كده هنزود الأسعار.

تحدث الرئيس عبدالفتاح السيسي، عن القضية الفلسطينية وما يسمى بـ”صفقة القرن”.

وقال السيسي: “صفقة القرن تعبير إعلامي أكتر منه تعبير سياسي وفي جميع الأحوال موقفنا واضح، نحن مع كل قرارات الأمم المتحدة المنظمة التي خرجت منها، حدود ما قبل 67، ودولة فلسطينية عاصمتها القدس الشرقية”.

وأضاف: “بنحاول نكون عامل إيجابي لايجاد مخرج مقنع للقضية ونسعى سعي حثيث للمصالحة الفلسطينية حتى تكون هناك قيادة واضحة للتفاوض وفي قطاع غزة بنعمل للتخفيف ما أمكن لتحسن أحوال المواطنين في القطاع، وكنا حريصين خلال الشهرين الماضيين وخلال رمضان اننا نخفف على الفلسطينين في القطاع”.

وتابع الرئيس: “لن نقبل بما لا يقبل به الفلسطينيين واللي يرضى به الشعب الفلسطيني إحنا معاه.. واتوجه للشعب الإسرائيلي لدينا فرصة عظيمة للسلام والاستقرار في المنطقة ولن يكون خصما من أمنك”.

واستكمل: لن نفرض ولا نستطيع أن نفرض على أحد حل بالاذعان وبالتالي لن نوافق على حل لا تقبله السلطة الفلسطينية وما سيقبله الفلسطينيون سنقبل به.

وأضاف: “مع سوريا نمثل الأمر من خلال المعارضة المعتدلة للوصول إلي صيغ توافق مع النظام السورى ونحن ندعم ليبيا وفي أسرع وقت نحتاج إلي اتمام الانتخابات ونن داعمين للجيش الليبي”.

وقال السيسي خلال كلمته في المؤتمر الوطني السادس للشباب بجامعة القاهرة، موجها حديثه لوزير البترول : ” يا مهندس طارق زود البنزين ماتقلقش، أنتم عمالين ترقصوا كيكي وبالعربيات”. طيب يا سيدي اعمل كيكي .

وأضاف السيسي، خلال كلمته في مؤتمر الشباب السادس بجامعة القاهرة: “في نوفمبر 2012 من استدعى الجيش.. الجيش اللي استدعى نفسه لحماية الأمن الوطني”.

وتابع: “يا ترى هل كان فيه شكل تآمري من الجيش لاسقاط النظام السابق.. اقسم بالله مفيش.. محدش كان بيشتغل فاتح الورق غيرنا.. هيطلع البيان الفلاني بالصيغة دي عشان ندي القائمين الإحساس بالخطر.. وكان فيه كلام في الكلية الحربية بيتقال خلي بالكم سندخل لنفق مظلم.. لو سقطت مصر تسقط المنطقة”.

تحدث الرئيس عبدالفتاح السيسي، خلال فعاليات المؤتمر الوطني السادس للشباب في جامعة القاهرة، عن المصالحة، دون الحديث عن أطراف أخرى.

وقال السيسي: “إحنا مش هنعمل مصالحات، اللي هيعمل مصالحة أنتم (الشعب) وتحيا مصر بيكم كلكم، وده حماية لدولة ودين، وهنتحاسب على اللي بنعمله لبلدنا ودينا”.

وأضاف السيسي: “مسارنا واحد، اللي عاوز يعيش في وسطنا بأمان وسلام وميرفعش السلاح في وشنا أهلا وسهلا، ما بحبش الإساءة أصلا ولدينا القدرة على أننا نتجاوز كل التحديات”.

وتابع: “اللي عايز يعيش زينا يعيش، واللي هيحاول يرفع السلاح في وشنا، الجيش والشرطة قادرين مهما كانت التضحيات”.

وقال السيسي  تعليقا علي الشكل الحضارى لجامعة القاهرة وقت المؤتمر :”هل كل الجامعات قبل العام الدراسي القادم يمكن يبذل جهد لاعدادها وتجهيزها للطلبة بهذا الشكل ؟”، مضيفا “أنا ماعرفش هاتجيبوا الفلوس منين احنا هانعمل مسابقة للجامعات ونشوف افضل جامعة بجهود الجامعة وطلبتها رفع كفاءة المنشاءات شكلا حتي”.

وأكد أهمية “اعطاء انطباع جيد للعالم حتي لو ظروفنا صعبة”، مضيفا “إحنا بنقدم نفسنا مش عشان أنا موجود عشان العالم كله بيشوفنا، لا يرانا إلا بما يليق بمصر”.

ووجه حديثه لجامعة القاهرة: “انتوا في الجامعة معاكم فلوس كتير، قبل بداية الدراسة بـ 15 يوم تتشكل لجنة من التعليم العالي والرقابة ومجلس الوزراء ونعلن أفضل جامعة، والمدارس أيضا، لتقييم شكل التطوير المفترض وحتي المدارس الخاصة”، ووجه حديثه الي المواطنين أن المدارس بها أولادنا جميعا ويجب التكاتف من أجل تطويرها.

الميرغني: لما نوقف زراعة الأرز ونستورد ده هينتشلنا من العوز وألا هيخلينا عبيد عند الدول الكبرى

رد إلهامي الميرغني، نائب رئيس حزب التحالف الشعبي، الخبير الاقتصادي، على تصريحات الرئيس عبد الفتاح السيسي، التي قال فيها: «لما بأحاول أخرجكم من العوز يعملوا هاشتاج إرحل يا سيسي.. في دي أزعل».

وقال الميرغني في حسابه على «فيس بوك»، السبت: «انتشال من العوز، إزاي، هو معدل الفقر كان كام عام 2010 ووصل كام في 2014 ودلوقت بعد التعويم بقي كام؟!، وتركز الثروة والمليونيرات كان كام وبقي كام».

يذكر أن تقارير الجهاز المركزي للتعبئة العامة والإحصاء تشير إلى أن معدلات الفقر في مصر ارتفعت من 16.7% عام 2000 إلى 27.8% عام 2015 أي نحو 25 مليون مصري تحت خط الفقر.

ونقلت صحيفة اليوم السابع عن الدكتورة هبة الليثى إحدى المشاركات في فى وضع تقديرات خط الفقر للعام الحالي والمتوقع إعلانه في أكتوبر القادم، ارتفاع نسبة الفقراء، الذين يعيشون تحت خط الفقر، إلى 35% على الأقل فى خط الفقر الجديد لبحث 2017.

وتابع الميرغني : «إحنا مش بنفتي ولكن بنتكلم بتقارير التعبئة والإحصاء والمنظمات الدولية المنشورة، مين أكثر جالية اشترت عقارات في دبي غير الخليجين، كم تضاعفت ثروة أكبر المليارديرات في مصر من 2010 إلى2017، الأرقام منشورة ومعروفة».

وقال الميرغني: «كل القوانين والسياسات والقرارات لمن تنحاز للكادحين ومحدودي الدخل أم لرجال الأعمال والمستثمرين الأجانب والمضاربين في البورصة».

وأضاف: «لما نوقف زراعة الأرز ونستورد ويبقي الاستيراد أهم من الزراعة ده هينتشلنا من العوز وألا هيخلينا عبيد عند الدول الكبري والشركات الدولية، الحقائق موجودة ومنشورة ومعلنه، ومعروف، أنتو مين وإحنا مين».