كلنا هنتحاسب في الآخرة.. لكن الشعب هو اللي بيحاسب على الأرض ولو مش راضي يبقى لازم السياسات أو الحكام تتغير
داود: احنا بنخرج من العوز والفقر لمزيد من العوز والفقر.. وباستغرب لما الرئيس يقول استحملوا وضحوا وكلوا وجبة واحدة
علق خالد داود، القيادي بحزب الدستور، على تصريح السيسي حول أداء وسياسات نظامه ورضاء الشعب عنها، خلال فعاليات المؤتمر الوطني السادس للشباب المنعقد منذ أمس في جامعة القاهرة.
وقال السيسي، أمس السبت: “اللي اتعمل واللي هيتعمل رضيتوا بيه أو ما رضيتوش بيه هقابل بيه ربنا وأرجو أن يقبله منا”.
وأشار داود في تعليقه، الذي نشره على حسابه بـ”فيسبوك”، أن الحساب أمام الله سيكون في السماء ولن يعرفه أحد، أما نحن فهنا على الأرض، والشعب هو من يحاسب المسئول.
وتابع: “الشعب هو اللي بيحاسب على الأرض، ولو مش راضي، يبقى لازم السياسات تتغير، لأن الشعب في النظام الديمقراطي هو اللي بيختار الحاكم، وممكن يغيره لو ما رضيش”.
وإلى نص ما قاله خالد داود:
طبعا الكل ركز في تصريحات السيسي في مؤتمر الشباب امبارح على قوله انه “زعلان” من هاشتاج ” #ارحل_يا_سيسي ” وقوله، “عايز أخرجكم من العوز وأخليكم أمة ذات شأن تعملوا هاشتاج ارحل ياسيسي؟”.
أنا في الواقع اللي قلقني تصريح تاني بيكرره الرئيس مرارا، وهو قوله “اللي اتعمل واللي هيتعمل رضيتوا بيه أو ما رضيتوش بيه هقابل بيه ربنا وأرجو أن يقبله منا”.
المخيف في هذا التصريح أن الرئيس يكرر دائما أن حسابه أمام الله، مش أمام الشعب، واللي مش مهم يرضى أو ما يرضاش. طبعا احنا عايشين على الأرض مش في السماء، ومحدش حيعرف بأي حال ربنا حيحاسب المسؤول ازاي على ادائه لان كلنا حنبقى واقفين مرعوبين امام الله سبحن وتعالى من هول الحساب.
بسم الله الرحمن الرحيم: فَإِذَا جَاءَتِ الصَّاخَّةُ (33) يَوْمَ يَفِرُّ الْمَرْءُ مِنْ أَخِيهِ (34) وَأُمِّهِ وَأَبِيهِ (35) وَصَاحِبَتِهِ وَبَنِيهِ (36) لِكُلِّ امْرِئٍ مِّنْهُمْ يَوْمَئِذٍ شَأْنٌ يُغْنِيهِ”.
لكن الشعب هو اللي بيحاسب على الأرض، ولو مش راضي، يبقى لازم السياسات تتغير، لأن الشعب في النظام الديمقراطي هو اللي بيختار الحاكم، وممكن يغيره لو ما رضيش.
وكمان احنا عايزين دولة مؤسسات، مش دولة القائد الفرد، والسلطة المطلقة مفسدة مطلقة، وما ينفعش الرئيس يتحمل كل المسؤوليات لوحده. وبالتالي ما ينفعش يكون المنطق “عايز أخرجكم من العوز وأخليكم أمة ذات شأن.” الشعب كله بيحب بلده، وعايز يخرج من العوز وتكون مصر أعظم الأمم.
المشكلة اننا بنخرج من العوز لمزيد من العوز، ومن الفقر لمزيد من الفقر. وبالتالي لما الرئيس يقول للناس استحملوا وضحوا وكلوا وجبة واحدة بس علشان الوطن ينهض، انا بستغرب جدا، لان الرئيس اكيد قدامه دراسات بتؤكد ان اكثر من تلت المصريين بيعيشوا تحت خط الفقر، والطبقة المتوسطة بقوا فقراء في ظل الارتفاعات المتواصلة في الأسعار.
الشعب المصري يا ريس بيعاني من سوء التغذية، ومعرفش مين قال لحضرتك ان غالبية الشعب بياكل تلات وجبات أساسا، وحتى الوجبة الواحدة اللي بيتقوت بيها ناس كتير مش مغذية.
