أول رسالة للطبيب وليد شوقي من محبسه إلى ابنته نور: كان نفسي مابعدش عنك لكن في حاجات أقوى مننا زي السجن

الطبيب المحبوس على ذمة القضية 621: لما تكبري هنتناقش في الجبرية والحرية والفرق بين المعرفة والإدراك

شوقي: كنت بحلم بتغيير العالم لمكان أفضل.. ومع النضج فهمت إن ممكن يكون بطرق كتير منها إنك تساعد إنسان

نشرت الزميلة الصحفية هبة أنيس، زوجة الطبيب المعتقل وليد شوقي، أول رسالة له من داخل محبسه، بعد أسبوعين من اعتقاله وحبسه على ذمة الانضمام لجماعة أسست على خلاف القانون.

ووجه وليد في رسالته الأولى، الحديث لطفلته “نور”، التي أكد لها أن “غيابه عنها لم يكن ابدا باختياره”، واعدا أياها باللقاء قريبا.

وقال شوقي، موجها حديثه لطفلته: “كان نفسي أوعدك مبعدش عنك لكن للأسف في حاجات أقوى مننا في الدنيا زي السجن وزي الموت.. وهناك شر في العالم، وده بيتطلب صراع مع الخير”.

يذكر أن قوات من الأمن قد شنت حملة أمنية موسعة، استهدفت عيادة الطبيب وليد شوقي، وألقت القبض عليه من داخل العيادة في مقرها بمنطقة السيدة زينب.

فيما قال المحامي أحمد عثمان، بمؤسسة حرية الفكر والتعبير، إن نيابة أمن الدولة قررت في 29 أكتوبر الماضي، تجديد حبس شوق 15 يوما، بعد إدراجه على القضية 621 لسنة 2018.

ويواجه شوقي، بحسب المحامين، اتهامات في القضية بالانضمام لجماعة شكلت على خلاف أحكام القانون، وبث ونشر إشاعات كاذبة، وإساءة استخدام وسائل التواصل.

نص رسالة وليد شوقي:

بنتي الحبيبة نور.. وحشتيني أووي

لما والدتك قالتلي إنها حامل أنا اتخضيت حسيت بمسؤولية ضخمة على كتفي ارتبكت شوية بس بعدها حسيت بشعور غريب أوي أول مرة أحسه.. مشاعر مختلفة تماما عمري محسيت بيها قبل كدا.. فكرت كتير يا نور ومع الوقت أدركت معاني كتيرة مكنتش مهمة أوي عندي حتى لو كنت عارفها.. المعرفة غير الإدراك وهشرحلك الفرق لما تكبري شوية إن شاء الله.

كان عندي خوف رهيب على والدتك وعليكي يوم ولادتك لكن بالتفكير ومع الوقت الخوف تحول لطمأنينة غريبة وإتأكدت لما سمعت من شخص قريب عبارة “ربنا هو الحافظ بيك أو من غيرك ممكن تعيش عادي وتبقى كويسة وناجحة وسعيدة كمان مش في أطفال أهلهم بيموتوا وبيكبروا وبيبقوا ناجحين وسعداء”.

لما كنت أصغر شوية كنت بحلم بتغيير العالم لمكان أفضل وكنت فاكر إن ده لازم يكون على نطاق واسع وبطريقة واحدة لكن بالتجربة ومع النضج فهمت أكتر إن تغيير العالم ممكن يكون بطرق كتير منها إنك تساعد إنسان إنه يفكر ويختار ويعيش أفضل ويبقى نافع لنفسه وللناس حواليه فما بالك لو كان الإنسان ده من لحمك ودمك حتة منك ساعتها ده هيكون أفضل استثمار وأجمل كفاح.

للأسف يا نور في شر في العالم، حقيقة لازم نفهمها ونتعامل معاها ووجود الشر بيستلزم صراع بينه وبين الخير.. اتمنى اقدر اساعدك وأقوم بدوري ومسؤوليتي ناحيتك وأساعدك تختاري طريقك لأن الدنيا دار اختيار وتعب.. هنفرح ونزعل ونكسب ونخسر.. هنقابل ناس كتير وهنفارقهم.. هنحب وهنكره.. هننتصر وننهزم ونكبر ونحلم.. هنحقق أحلامنا أو منحققهاش مش مهم المهم إننا نسعى ونحارب علشانها.

حبيبتي نور.. أنا عمري مكسبت من حرام ولا أكلت حاجة مش حقي.. وعمري ما أكلتك ولا هأكلك من حرام.. وناوي أقوم بدوري نحيتك لأخر نفس.. كان نفسي أوعدك مبعدش عنك لكن للأسف في حاجات أقوى مننا في الدنيا زي السجن وزي الموت.. لما تكبري إن شاء الله هنتناقش في مسألة الجبرية والحرية.

ربنا يحفظك إنت ووالدتك ويعيني على أمانتكم.. هشوفك قريب إن شاء الله.. هتعرفيني وهشرحلك أنا اتحبست ليه علشان ساعتها تقرري موقفك مني.

كل الحب والأشواق يا نور عيني

وليد شوقي

1/11/2018